«Аьрзи» яхача берий лагере, денала урок дӏахьош хилар СВО ветеран
Тӏема операце ветеран Шоанахой Муслим, иштта «Даьхен лорабой» яхача ганза мехкарча филиала болхло Тиймарзанаькъан Луиза юкъейолаш, денала урок дӏайихьар, «Аьрзи» оалача берий лагере. Ураотташ латтача къонача тӏехьен Даьхенцара безам чӏоагӏбара тӏехьа дӏахьош болх ба из.
«Шоанахой Муслима къонабарашта дийцар тӏема аренашкарча гӏулакхех, тахан цу моттигашка лакха майрал, денал гойташ латтача вай къаман яхь йолча къонгех, бӏухошта юкъерча доттагӏалах. Къаьстта терко еш дийцар ветерана, дешархошкара хӏара денна ухача каьхатех, цар тӏема моттигашкара халонаш токхаш латтача бӏухой дог айдеш хиларах.
Тиймарзанаькъан Луизас берашца дийцар вай къаман беркатеча ӏадатех, гӏулакхех, нах массахана шоайла гӏо деш хила безарах. Дукха хаттараш дар къонабарий тӏема ветеранага дала, царех хӏарадар доашхаш къамаьл дир кхетаче», - йоах «Сердалога» ганзера кхаьчача хоамо.
Белгалде деза, иштта йола кхетаченаш берашца массахана дӏакхухьаш йолга. Ахкан хана, бераша салоӏача лагере ухаш, иштта кхыйолча дешара моттигашка кхетаченаш еш, болх лоаттабу «Даьхен лорабой» яхача ганзо.
