Илдарха-Гӏалий тӏара СВО ветеранаш лорашка чакхбаьлар
Шахьарерча поликлинике шоай дегӏа хьал миштад хьожаш чакхбоалаш хилар СВО ветеранаш. Из хоам «Сердалога» бир «Даьхен лорабой» яхача ганза регионерча филиале.
«Тӏема операце доакъашхой, иштта цар цӏагӏара нах лорашка чакхбоалаш, унахцӏенон хьал малагӏча боараме да тохкаш хилар. Тӏема декхараш кхоачашдеш лозабаьча ветераний могашал миштай хьежар тайп-тайпара лораш, йоккха терко еш, анализаш дӏачуэцаш. «Даьхен лорабой» яхача ганза болхлой Темарханаькъан ӏийса, Чиймарзанаькъан Марем бар цу гӏулакхага хьожаш», - йоах тха газетага кхаьчача хоамо.
«Ганза керттерча декхарех да, Даьхе лораеш лаьттарий гӏулакхага хьажар, цар могашал лораяр. Ханнахьа лорашка чакхвоалаш хиларо моллагӏа лазар хьакхийттача хана гучадоаккх, цудухьа каст-каста дарбанче водаш хилар лоархӏаме да», - аьлар Темарханаькъан ӏийсас.
