СВО ветеранех сийдола хьаьший хилар, Илдарха-Гӏалий тӏа денала урок дӏахьош
Лаьрххӏача тӏема операце ветеранех хилар сийдола хьаьший, Илдарха-Гӏалан №1 йолча юкъерча ишколе денала урок дӏахьош, яхаш, дийцар «Сердало» газетага из болх вӏашагӏбеллараша.
«Из кхетаче йолаш, тӏема бӏухоша Хазанаькъан ӏаьлас, Евкуранаькъан Ислама, Даканаькъан Исраила шоай эскарерча амалах, иштта Украине дӏахьоча тӏема хьалах дийцар. Цар дувцар хетадаь дар шоай новкъостий денала, Даьхенцарча безама. Бӏухой дувцар дешархой дегаш ураоттадеш дар, дукха хӏама хьаийцар цар денал долча тӏема доакъашхошкара. Шоллагӏа дакъа дӏахьош, цар делар эскара вахарца дувзаденна хаттараш», - аьлар Гӏалгӏай Республикан «Даьхен лорабой» ганзо.
Тхога хоам баьчо яхачох, турпалхошца вӏашагӏкхетар дӏадахьаро сийрда уйлаш йитар, кагирхой шоай мехках доаккхал деш а хилар.
