Ер бутт чакхбаллалца, фийла хилара хьал дӏаьхдаьд Илдарха-Гӏалий тӏарча хьакимаша
25.05.2026 10:55
Ца соцаш догӏаш латтарах, хин моттигашкара тӏахьожам лелабу болх ер бутт йистебаллалца дӏахьоргба шахьарерча хьакимаша. Из хоам «Сердалога» бир мэре зарбан болх лелабеча Кхорахой Мурада.
Шахьара администраце белгалдечох, укх бетта 19-ча дийнахьа шахьара кулгал деча Дидиганаькъан Ахьмада тӏадиллар, сов дукха догӏаш латтарах моллагӏа хатар хуле, цу гӏулакха духьалъотта кийча хила, аьнна. Укх бетта 31-ча денга кхаччалца хин моттигашта тӏахьожам беш хургба шахьаре.
Цу оагӏонцара беррига болхлой лакха терко еш ба цу гӏулакха. 24 сахьата тӏахьожам беш нах ба Шолжа гонахьа. Таханарча дийнахьа 1 метрага кхоачаш айденнад из хий. Цӏаьхха, хатар хинна болх хуле, ма хулла кӏезигагӏа зе хургдолаш къахьегаш ба шахьаре.
