Боккхача дезала наьна дехар теркалдир Магӏалбикерча хьакимаша
Магӏалбикерча администраце дехар кхаьчар, кхо бер ше цхьаь кхоабаш ягӏача кхалсагагара. Ше чуӏеш йола фусам чӏоагӏа воча хьале, кхераме йолга белгалдир цо. Администрацена кулгал деча Къоастой ӏаддал-Хьамида тӏадилла из гӏулакх тахка арабаьлар болхлой.
«Администраце вахара оагӏонцарча гӏулакхех болча болхлоша теркалдир, из кхалсаг ший кхаь бераца чуӏеш дола цӏа дикка кулг тоха дезаш долга. Эггара хьалхарча оагӏонца цунна могаш дола гӏо де; цул совгӏа, кхача лоаттабергболаш из дӏаязъе лаьрхӏар цар», - дийцар «Сердалога» Магӏалбика кхален администраце зарбан болх лелабераша.
Магӏалбика кхален хьакимаша терко лоаттаю халача хьале болча бахархой дехарашта. Хӏара дехара ларах арабаьле, деррига тохкаш болх дӏахьу цар. Белгалде деза, администраци массахана йийлла йолга бахархой дехарашта, терко ца еш дутаргдац цига цхьаккха сага гӏулакх.
