Сийлахь-боккхача Даьймехка тӀема коталон 80 шу дизар мишта дездергда дийцар республике
Котало яьккха 80 шу дизар дездар дувцаш, кхетаче дӀайихьар цунга хьожача тоабо. Мехкадаь зарбан болх лелабераша белгалдечох, республике дӀаяхьа лерхӀ 150 совгӀа культуран, спорта кхетаченаш.
Программан юкъе да концерташ, гойтамаш, фестивалаш, спектаклаш, Ӏилман конференцеш. Къаьстта боккха теркам тӀабохийтаргба тӀемах лаьца сурташ, буктрейлераш даьча спортивни, кхоллама яхьашта. ТӀема юкъе дакъа лоацаш хиннача вай мехкахой вахара никъ бовзийташ бола болх арахеца лерхӀ.
«Вай Президента мехка кулгалхошта хьалхашка оттадаь декхар да, цу цӀайга кийчо яр лакхача боараме дӀахьо аьнна», - белгалдир мехкадас Келаматанаькъан Махьмуд-Ӏаьлас. Республикан кулгалхочо теркалдечох, кхувш латтача тӀехьено из котало вайга малагӀча наькъаца кхаьчай кхетадергдолаш хила еза дӀахьош йола кхетаченаш. Магаса чуйоагӀача кхоалагӀча зӀамигача кхалера къаьгӀе (аллея) кхетаченаш дӀаяхьа кийчъергйолаш, дийцар гулбеннараша.
«Магас» НТРК болхлошта тӀадиллар, тӀемах дувцаш дола советски, иштта кхыдола кинош хьокхилга; хӀаьта газеташта, журналашта хьалхашкара декхар - ма хулла дукхагӀа тӀемах лаьца яздар.
