Шолжа-Шахьара культуран Цӏагӏа «Ашарий ахкан сайре» хилар
Шолжа-Шахьара культуран Цӏагӏа боккхача безамца дӏайихьар, «Ашарий ахкан сайре» яха концерта программа. Из болх вӏашагӏбеллар яр театра, кинон, вай заман тароний Центр. Кхоллама сайре дӏахьош хиларах, нах гӏадбаха гулбелар, цига хозаш яр цӏихеза ашараш, иштта иллеш.
«Концерте белггала йола моттиг дӏалаьцар кхаь авторски композице. Уж хьакхеллараш бар ЦТКиКИ артисташ Гаьгенаькъан Ибрахӏим, Эккажанаькъан Роза. Цар кхоллама ашараш хьалха хозаш яр сцена тӏара. Къаьстта номераш гойтар Эккажанаькъан Маринас, Пхьугӏой Амира, Исраиловгӏар Ларисас, Эккажкъонгий Розас, Олганаькъан Марьянас. Программа ашарий гӏирсий дакъа хоздеш яр Оздой Лейла (гобой), ӏарпенаькъан Хьава (чӏондарг), цар гойтар лакха говзал.
Цу сайрахьа эггара чӏоагӏагӏа безам тӏабодаш хиннар дар Гаьгенаькъан Ибрахӏима ший тайпара кердадаьха иллеш, ӏарпенаькъан Хьавай ашараш (фортепиано), Эккажанаькъан Розай иллеш. Гулбеннараша дика хеташ тӏаийцар Пхьугӏой Амира, Эккажанаькъан Розас цхьана дӏаоалаш хинна иллеш, уж дар къаьнара беламе иллеш «Ала сога», «Рида, рида». Иштта цига Эккажанаькъан Розас дӏалекхар «Сакъердаргда вай гӏалгӏай» яха илли», - аьлар «Сердало» газетага ЦТКиКИ зарбан болх лелабераша.
Цу концертага хьажа баьхкача наха дег чура баркал аьлар артисташта, цар иштта безаме шоай мукъа ха дӏаяхьа таро хиларах. Цу программо юха а хьагойтар, ЦТКиКИ тоаба ший моттиге хилар, уж лакха начӏал дола артисташ хилар.
