Гӏалгӏайчен культуран Цӏа цӏенхаштта тоаде дӏадоладаьд
Гӏалгӏайчен гӏишлошъяра Министерствос цӏенхаштта тоаде дӏадоладаьд Наьсарера культуран Цӏа, яхаш, хоам бу «Сердало» газетага ГӏР гӏишлон боахамо.
«Керттера культуран гӏишло тоаяра балхаш дӏадоладаьд кхы а 2025 шера «Стройкомфорт» ООО яхача фирмо. Таханарча денга кхоачаш, уж балхаш 30 % даь даьннад. Шозза вӏаштӏардаьча цӏен чура къаьнара гӏирсаш, тхов хувцаш балхаш даь даьннад, иштта йистедаьннад электромонтаж яра балхаш, йӏовхал чуйиллар», - аьлар хоамо.
Говзанчаша, болхлоша бӏарчча балха оагӏув дӏахьош я, пенаш хьалдеш, инженерни коммуникацеш, технически гӏирсаш оттадар, иштта тайп-тайпара кхыдола балхаш деш. Цул совгӏа, гӏишло тӏера хоза хургйолаш тоае еза, гонахьара доазув баьццардерзадеш, хоздеш кулг тоха деза.
«Наьсарен керттера культуран фусам тӏахьожаме я, цига бӏарглокхаш ба цӏенхаштта тоадара балхаш деча Урхаллен говзанчаш. Карарча хана йиллача ханал тӏехьабусаш хӏама дац. Деррига балхаш кхоачашдаь даргда 2027 шера лайчилла бетта», - аьлар гӏишлон министра Иленаькъан Мусас.
Тахан хьабеш бола, дикал йола беррига болх «Дезал» яхача къаман проектах дӏахьош ба, цу гӏулакха дӏахьожадаьд 61 млн сом.
Из деррига чакхдаьнначул тӏехьагӏа, укхаза хургья искусство, кхоллам безараш вӏашагӏкхеташ йола хоза моттиг.
