Наькъашкара бокъонаш лархӏа езилга хьалхадаьккхар мехкахошта
24.02.2026 09:34
«Машинаца водар, дӏатӏехвалийта гӏашло» яха болам дӏахьош хилар Илдарха-Гӏалий тӏа ГИБДД болхлой. Из хоам «Сердалога» бир МВД. Дакъа лоацаш хиннараш бар шахьарерча № 1 йолча ишкола дешархой, шахьарерча Россе ОГИБДД ОМВД болхлой.
«Наькъашкара хатараш лаьгӏдара тӏехьа дӏахьоча балхацара болам бар из. Машинаца боагӏарашта хьалхадаьккхар, гӏаш водар дӏавахийтар мел лоархӏаме да, наькъашка массахана фийла, эздел лорадеш хила везилга. Из деррига белгалдеш дола каьхаташ дӏадийкъар ГИБДД болхлоша», - дийцар тха газетага.
Чӏоагӏа раьза дар бераш цу болама юкъе шоаш дакъа лоацаш хилара. Гӏаш леларашка массахана лоралуш, светофорага хьежа мара наькъ тӏа дӏатӏабувла йиш йоацилга дийцар болам дӏахьош хиннараша.
