Тӏема аренашкара бӏухой кхадж тоссаш ба
Тӏема аренашка Даьхен хӏама лорадеш латта Марзбиканаькъан Ислам хоржамашка дакъа лоацаш ва. Ший цӏен гаьна вале а, лоархӏаме декхар кхоачашде вӏаштӏехьадаьлар цун. Кхадж тасса аьттув хургбола бахьан лаха эттар из тахан, Даьхен хӏама хьаллаца ше кийча волга белгалдеш.
«Гӏалгӏайчен гаьна вале а, хоржамашка дакъа лоацаргда, аьнна, чӏоагӏо яь вар со дег чу. Вай боккхача мехка, республиканна лоархӏаме бола болх ба из, цунга хьежжа хӏаравар ший декхар дизза кхоачашде ураотта веза. Цӏагӏа вале а е цӏенна гаьнарча моттиге кхаьчавале а, кхадж тасса аьттув хургбола хӏама де хьажа веза», - дийцар Ислама «Сердалога».
2024-ча шерарча наджгоанцхой бетта денз, тӏема операцена юкъе дакъа лоацаш ва Ислам. Таханарча дийнахьа прапорщик волаш, радиорелейни оагӏонцарча балха тӏахьожаш ва из. Тайп-тайпарча совгӏаташца белгалваьв вай мехкахо тӏема аренашка. Цу юкъе я Суворова цӏерах йола, «Тӏем тӏа белгалваларах», «Тӏема сийле» яха майдилгаш, иштта СВО доакъашхочун майдилг а.
