Даьла духьа гӀо деш лелараша 98 гали нувхаш гулйир
22.12.2023 09:08
Ши кӀира хьалха, хаоттам хоза латтача хана арабаьнна, бахархоша массахана салоӀаш йолча юрта, Оалкама, гонахьара 98 гали нувхаш гулйир, Даьла духьа гӀо деш лелараша. Ӏалама гӀулакхех йолча министерствон болхлошкара нувхаш юстараяха гӀо дийхар цар.
Из хоам «Сердало» газетага бир министерствон болхлоша. «Шоайла къамаьл даьчул тӀехьагӀа, нувхаш арайоахаргйола гӀулакх юртарча администраце шийна дӀатӀаэцаргдолаш чӀоагӀо йир хьакимаша», - йоах тхогарча хоамо. ХьатӀадоагӀача шоатта дийнахьа юха Шолжа кхале гулбала лаьрхӀа ба Ӏаламах дог лазараш.
Нувхех кхыдола доазош цӀендеш хургба уж. Дика хургдар, уж нувхаш Ӏойоаржаерий дегаш а кхетам а иштта цӀенбе йиш яларе. Цар хьаькъало тахан кхетадац, шоаш леладер мел ийрча, Ӏалама зулам деш хӀама да.
