Дегӏацара дӏа ца доала лазараш долча наха дарбаш дара говзал лакхъеш ба Гӏалгӏайчен лораш
Гӏалгӏайчен шахьарий, кхалений поликлиникай, дарбанчений говзанчаш шоай профессиональни боарам лакхбеш ба. Республикан унахцӏенон Министерствон кулгалхочун ӏалбакханаькъан Зарай амарах, республикерча терапевташта лаьрхӏа массехк семинар дӏайихьар. Керттера бахьан - хронически оала лазараш долча наха деш дола дарба дикагӏа дар, иштта бахархой лорашка шоай ханнахьа чакхбоалаш хилийтар.
«Цу кхетаче къамаьл деш хилар юкъарлон могашала, лорий профилактикан Республикански центра керттерча лора гӏонча Оздой Лида. Цо ма дарра довзийтар юкъедаьха лорий кердадараш. Семинараш дӏайихьар интерактивни кепара, цига хӏара доакъашхо таро йолаш вар клинически хьалах лаьца шийгара хаттар дала, иштта шоай балха даькъ тӏара моттигаш тахка. Унахцӏенон министра ӏалбаканаькъан Зарас декхар оттадир, республике хьалхарча мугӏаре латтача лорий болх чӏоагӏбара. Нах лорашка чакхбахара болх дӏабахьар – из духхьал каьхаташ вӏашагӏтеха ӏе йиш йолаш бац, цун керттера маӏан да, ханал хьалха леш болча наьха, заӏапхой кхераме хьал аттача даккхар, цар хьалага хьажар, ший ханнахьа дарба а деш», - аьлар «Сердало» газетага Гӏалгӏайчен унахцӏенон Министерстве.
Уж кхетаченаш дӏаяхьарах, лорий болхлошта хӏара денна дӏахьоча гӏулакха тӏа, хьалхарча аргӏагӏа эшаш дар довза таро хилар. Из дар дарба дара даькъ тӏа, дукха дарба де дезаш лазараш долча унахошца мишта хила веза, фу ха деза хьалхадоаккхаш, иштта таьрахьий даькъ тӏа лорий карташ, кхыдола каьхаташ леладара болх бовзийташ.
