Лораш-неврологаш шоай балха говзал лакхъеш ба
ГӏалгӀай республикански Ӏоахашканаькъан А.О. цӀерагӀча клинически дарбанче шоай балха говзал лакхъеш ба республикан неврологе даькъ тӀа болх беш бола лораш. ГӏалгӀайчен тайп-тайпарча моттигашкара лораш гулбелар цига. Дешара даькъа жоп луш яр рефлексологи, мануальни терапи чулоацаш йола Российски лорий академе неврологе кафедра.
«Даим балха говзал лакхъяр - лорий балха даькъ тӀара лоархӀаме моттиг. Таханара лорий болх сиха дегӀабоагӀаш ба, цудухьа цар даим цу тӀехьа шоай балха говзал лакхъе еза, кердадараш юкъе а доахаш. Тха декхар да - уж хьалаш республике хургдолаш, царна Ӏалашо яр. Къаьстта цудухьа республикан унахцӀенон Министерствос вайцига бех федеральни лорий, иштта дешара урхалленашкара говзанчаш, ГӏалгӀайчера арабала а ца безаш, дикагӀа шоай болх дегӀабоалабе вай лорий таро хургйолаш», - аьлар «Сердало» газетага республикан унахцӀенон министра Ӏалбаканаькъан Зарас.
Хӏанз дӀахьош бола болх накъабаргба лорашта, шоашта ховш дар кердадаккха, иштта неврологе даькъ тӀа кердадараш Ӏомаде.
Из беррига болх лаьрхӀа ба, къаьстта нервашца дувзаденна хала лазараш долча наьха могашал тоаяр лакхача боараме хилийта.
Цига ладувгӏаш болча говзанчашта дика довзийт лорий балха юкъедахьар, из мишта накъадоалаш да, ГӏалгӀайчен неврологе дикал лакхъяра.
