Мехкарча РКПЦ лораша диазлагӀа бер хьалъийцар, кхалсаг эттӀаеш
ЭттӀаеш кхо бер хьалъийца, диълагӀа бер малхадаларга хьежаш лийннача мехкарча кхалсага тӀахьожам лоаттабеш бар перинатальни моттигера лораш. Из хоам «Сердалога» бир цигара. Лораша белгалдечох, эттӀаеш бераш хьалъийдеш йолча кхалсага хьал массахана тӀахьожам безаш хул, тайп-тайпара кхерамаш да цу юкъе.
«Хьалхара кхо бер малхадоалача хана, бера тӀера кашилг (плацента) чухьа дӀатӀалета хиларах, Москверча дарбанче эттӀайир из. Ма дарра аьлча, чӀоагӀа тешам боацаш хул иштта хьал долча наьна гӀулакх, цунга хьежжа, юххьанца денз, бера малхадала ха отталца, чӀоагӀа тӀахьожам лоаттабир цунна лораша.
Шоай болх дика бовзача лорий, Даьла къахетамца, Цун низаца аьттув баьлар, бери нанеи могаш-маьрша долаш, шоай гӀулакх чакхдаккха. Карарча хана цӀабаха кийчо еш да нана а бер а», - дийцар тхога перинатальни моттиге керттера лор йолча Къоастой Заретас.
