Берий беша аха аьттув болаш да, вай мехкара 1,5 шергара 7 шерга кхаччалца ханаш йола бераш
ХӀара шера хӀана яц аьнна, хьаеллаш латт вай мехка берий бешамаш. Таханарча дийнахьа, 1,5 шергара 7 шерга кхаччалца дола бераш, 100% кхоачаш, берий бешамашка аха аьттув болаш да.
«2021-ча шера Ӏан шоллагӀча бетта 74,79 процента тӀа латтар из гӀулакх. Керда шу доладелча денз, шоай наӀараш хьайийллар 12 кердача берий бешо, 1 530 бер тӀаэцаш», - белгалдир Мехкадаь зарбан болх лелабераша. Керда берий бешамаш хьайийллар МагӀалбике, Наьсаре, Шолжа-Шахьаре, Яндаре, Долакха-Юрта, Эбарга-Юрта, ГӀажарий-Юрта. Из боккха аьттув республикан баьннаб федеральни, моттигерча программашка гӀолла. Царех я «Дешара гӀулакх тоадар» яха программа, «Демографи» яха къаман проект.
«Вай декхар - мехкарча хӀара бера шоашта яьча берий беша аха аьттув хилийтар, цу тӀехьа къахьегар; хӀана аьлча кхоанарча цар вахаре лоархӀаме да из гӀулакх», - йоах тхога бенача хоамо.
