Гӏалгӏай метта хетаяь кхетаче дӏайихьар вай мехка
Вай метта хетаяь йоккха кхетаче хилар Магасе. «Сердалога» из хоам бера шахьара мэре болхлошкара. Цига гулбеннабар НИИ болхлой Ноакастхой Хаваж, Аьгенаькъан Лемка, Магасерча Юкърлон Совета кулгал деш вола Эсамарзанаькъан ӏалаудин,
«Зӏамига зирак» яхача берий беша кулгал деш йола Котанаькъан Фатима, тайп-тайпарча оагӏонех йолча колледжа ЧПОУ кулгалхочун гӏонча Беканаькъан Хадижа, «Марем» гимназена кулгал деш йола Бохтаранаькъан ӏайшет», - дийцар тха газетага. Халкъашта юкъерча наьна метта Денна хетаяьча кхетаче дукха адам гулденнадар. Гӏалгӏай мотт мел кӏоарга, бӏаьхий ба, цун хӏама лорадара тӏехьа къахьега дезарах дийцар кхетаче.
«Хозача дешашца наьна меттала дувца, цун хӏама хестадерашка ладувгӏа догдоагӏаш дола ди да ер таханардар», - аьлар шахьара мэре. Берий бешара, ишколашкара даьхкача бераша гӏалгӏай меттала байташ ешаш, дог айдир массане. Кхетаче дӏахьош хиннараша доккха баркал аьлар наьна метта хӏама хьаллаца гулбенна хиннарашта.
