МагӀалбика дешархочо, ЕГЭ юха дӀа а енна, 100 балл яьккхар
07.07.2025 09:50
МагӀалбика-Шахьара №3 йолча юкъерча ишкола дешархочо ГӀазданаькъан Марема, ЕГЭ юха дӀаяла таро хиларах, химех 100 балл яьккхар, из юха дӀа а енна, яхаш, дийцар ГӀалгӀай Республикан дешара, Ӏилман Министерстве.
Белгалду, ше ишколе яьккхача юкъа цу йиӀига дика дешаш хиннилга; цул совгӀа, цӀе аттестат, иштта «Дика дешарах» яха майдилг а елар цунна. Из доацаш а, дукхача олимпиадашка, яхьашка дакъа лоацаш хиннаяр, коталон моттигаш а йоахаш.
«Цу толамашца ГӀазданаькъан Марема таро я моллагӀча дикагӀа йолча мехка вузе деша отта. Цо хержар лорал, из лаьрхӀа я цӀихезача Сеченова цӀерагӀча университете деша отта», - аьлар ГӀалгӀайчен дешара министерстве.
