Цӏихезача кавказоведах Семенов Л.П. дувцаш бола гойтам хьабийллар мехка
Цӏихезача ӏилманхочох - кавказоведах, лакха говзал йолча тохкамхочох, археологах, этнографах дувцаш бола, цун 140 шу дузача денна хетабаь гойтам хьабийллар мехкахбаьхача наьха Мемориальни моттиге. Семёнов Леонид Петрович дика вовзаш хиннав вай мехка санна массанахьа а.
«Къилбаседа Кавказа къаьнарча вахара хӏама тохкаш итташ шераш доадеш къахьийгача цу сагах дувца дукха да тахан. ӏилманхочун сурташ, цох лаьца яздаь каьхаташ, архивашкара видеош, ХХ-ча бӏаьшере йолалуча хана, гӏалгӏай къаман юкъе лаьттача ӏадатех, гӏулакхех цо кийчдаь балхаш, иштта кхыдараш довза йиш я гойтаме», - дийцар «Сердалога» мехкарча МКЖР.
Гӏалгӏай гӏалаш хьалъярах лаьца лоархӏаме болх язбаь саг ва Семенов Леонид. Хана йӏоахалца телха, хаьрца йолча гӏалай юххьанцара кеп мишта хиннай тахка аьттув баьннаб вай, цо яздаьча балхашка гӏолла. Кавказоведаша боккха пайда эцаш да цун книжкаш тахан а. Лоархӏаме, дукха хӏама довзийташ бола гойтам ба ала лов цох тахан. Вай мохк дега гарга, хьамсара хиннача сага бӏаргашка гӏолла Гӏалгӏайче йовза аьттув ба мехкахой а хьаьший а.
