«Дошо пхи седкъа» яхача гойтаме, даха хилар СВО доакъашхой бераш
РФ Турпалаш болча вай мехкахошта хетабаь « Дошо пхи седкъа» яха гойтам хьабийллар, республикерча суртанчий Паччахьалкхен музее. Цига даьхка хилар тӏема аренашка лелалача бӏухой бераш. «Даьхен лорабой» яхача ганза мехкарча филиала болхлой бар цу гӏулакха хьалхаэттараш.
«Музее экскурси лелаеча Пхьилекъонгий Луизас хьаьшашта дийцар Россе Турпалаш болча вай къаман къонгех, цар наькъех. Музея залашка гӏолла гобоаккхаш, цу чура вахар, къаман истореца дувзаденнараш дӏадовзийтар берашта. Белгалде деза, тӏема операце доакъашхой берашца из тайпара болх дӏакхахьар къаьстта лоархӏаме долга.
Цу гӏулакхо Даьхен истори, деналах, майралах бизза болаш доккхий декхараш токхаш лаьттача къаман къонгий вахара никъ бовзийт берашта, иштта цар кхетаду Даьхе езар, цун хӏама лорадар хӏара сага декхар долга. Еррига Россе цӏихеза болча къонгашта хетадаь гойтамаш каст-кастта дӏакхахьа деза мехка, хӏана аьлча вай къонача тӏехьен дукха хӏама довзаргда царга гӏолла»,- дийцар «Сердалога» мехкарча ИЗО музее.
Маьцхали бетта 5-ча денга кхаччалца дӏахьоргба цу гойтамо ший болх. Мехкарча бахархой аьттув ба шоай къаман сийдолча къонахий истори довза. Геттара дика хургда ишттача моттиге дезал болхаш хилча.
