Кхо шу даьнна йиӀиг кулг доацаш йитанзар ДРКБ хирургаша
Токаца кхестача дулх охьача гӀирса чу кулг чуделлача кхо шу даьннача йиӀига лакха говзал эшаш йола операци еш хилар республикерча Берий клинически дарбанчера лораш. 2022-ча шерарча йиӀига аьрда кулг чӀоагӀа дохадаь хиннад.
Нанас хьадувцачох, токаца кхесташ латтача дулх охьача гӀирса чу деллад цо кулг. Эггара хьалха из бӀаргадайнача хана, кулг дӀадаккха дезаш хилара тӀакхувш бар лораш, хӀана аьлча из чӀоагӀа дохадаь, пӀелгаш эттӀадаь дар.
Бакъда, Даьла къахетамца, Цун низаца, лакха говзал йолча вай лораша боккъал хала лоархӀаш йола операци дӀайихьа, дохадаь хинна пӀелгаши кулги вӀаший тийгар. «Човнаш чӀоагӀа хала, йоккха яр, - дувц травмотолог-ортопед волча Гарданаькъан
ТӀахӀира. – БӀаьхача пӀелга тӀехк йохаяьяр, иштта биълагӀча пӀелга тӀехк, пӀелгаш вӀашкадохийташ дола мазаш тийдадар, нана пӀелга чухьнахьа чӀоагӀа йоккха човнаш яр».
Операци дӀахьош баьхка лораш бар Гарданаькъан ТӀахӀир; травмотологийи ортопедийи оагӀонна кулгал деш вола Хьаьшанаькъан Ӏийса, анестезиолог- реаниматолог Чаренаькъан Анжела. Чачхамий пластика, остеосинтез МОС (металлоостеосинтез) дӀахьош, дохадаь кулгацара мазаш вӀаший хетта, кулг дӀа ца доаккхаш дитар говзача лораша.
Карарча хана йиӀиг ший кхетам чу я, палате Ӏочуйига цига дарба дӀахьош латт. Цу гӀулакхо хьагойт, республикерча Берий клинически дарбанче къахьегаш бола лораш лакха говзал йолаш, тӀехдика шоай декхараш кхоачашдеш болга. Иштта вай кхетаду, зӀамига бер цхьаккха минота тӀахьожам боацаш дита йиш йоацилга, боккхийчар бӀарг тӀерабаьлча, доккха хатар хьахила йиш я.
