Мехкашта юкъерча боламе дакъа лоацаш хилар вай мехкара къона говзанчаш
Оалкамарча «Говзанча» яхача кружоке кхебаь Джогӏастанаькъан Хадиджа, Бохтаранаькъан Хадиджа регионашта юкъерча «Вай цхьана – Росси» яхача боламе дакъа лоацаш хилар. Лакха говзал гойташ белгалбаьлар уж цига.
«Ший тайпара дола балхаш дар йиӏигаша цига гойтараш – пластилинографи оалача оагӏонца хьакхелла къаман ӏадаташ, культура белгалъеш дола сурташ. Къаман гӏарчожца тоадеш хьадаь балхаш дар уж. Лоархӏаме дипломаш луш, лакха мах оттабир цар сурташта», - дийцар «Сердалога» Оалкамерча культуран Цӏагӏа.
Культуран гӏулакхех йолча министерствос, Селий мехкарча къаман кхоллама Цӏено цхьана вӏашагӏъеллача проекто боккхача мехкара 300 совгӏа начӏал дола къонабараш гулбир. Дикка гаьнабаьннараш санна, хӏетта кхоллама никъ байза бола дешархой бар цига шоай говзал гойташ.
