ГӀалгӀайчен къонача суртанчашта хьалха – Сийлахь-йоккха Котало

Берий исбахьален ишколе укх деношка дӀадихьар Сийлахь-боккхача Даьймехка тӀем тӀа Котало яьккха 80 шу дузаш хилара, къаман моастагӀашца къовсам лоаттабара, машара, цхьоагӀон шера хетадаь класса сахьат, яхаш, дийцар ГӀалгӀай Республикан культуран Министерствон зарбан болх лелабераша.
Хьехархоша дийцар берашта, вай халкъо из Котало мел хала яьккхар, малагӀа денал цига гойтар тайп-тайпарча къамий, диний викалаша.
Вай декхар да, из дагалоаттам лорабар, из тӀехьа тӀабоагӀача ноахала дӀабалар.
«Тхо тешаша да, цу тайпарча кхетаченаша берий Даьхенцара безам совбоаккхаш, царна шоай Даьхен истори дикагӀа довзийташ хиларах.
Цу тайпара, берий исбахьален ишколо дӀахо дӀахьош ба, берий Даьхенцара безам совбоаккхаш бола болх; шоай Даьхе езаш, цун турпалхошта карагӀдаьннар довзаш, машарга, цхьоагӀонга кхоачаш уж хургболаш»,-аьлар кхетаче вӀашагӀъеллараша.