АТК кхетаче хилар тахан Магӏалбика кхале
Терроризм яхача зулама духьале лоаттаеча комиссе кхетаче дӏаяхьа гулбелар тахан Магӏалбике. Кхален администрацена кулгал ду Къоастой Ӏаддал-Хьамид вар кхетаче дӏахьош хиннар. Цига гулбелар тайп-тайпарча моттигашкара болхлой, юрташкарча администрацен кулгалхой, иштта дешареи ӏилмани гӏулакхех йолча Министерствон Магӏалбика кхалера куратор, кхален Керттерча дарбанчен керттера лор.
«Кхален моттигашкара кхерамзленца дувзаденнараш лорадара тӏехьа, кхоачашде дезарех дийцар гулбеннараша. Цу балха бехктокхамечар докладаш йир цига. Дӏахойодача хана дӏабахьа безача балхах, цу оагӏонцарча массехк лоархӏамечарех дийцар гулбеннараша. Шахьаре, кхален юрташка кхерамзлен хьалацара гӏулакхаш боаггӏача боараме лорадеш, массахана терко еш хила безилга белгалдир цига», - йоах «Сердалога» Магӏалбика кхален администрацера кхаьчача хоамо.
Къоастой Ӏаддал-Хьамида ӏаьдала болхлошта, кхален моттигий хьакимашта хьалхадаьккхар, бахархой хьал лорадар тахан керттерча декхарех долга. Магӏалбика кхален доазон тӏара лоархӏаме моттигаш лораеш бола болх дикка чӏоагӏбе, моллагӏа хила тарлуш долча воча хӏаман хьалххе уйла яь, кийчо яь хила дезилга теркалдеш, къамаьл дир хьакима.
