Селий мехка дӏайихьача семинаре дакъа лоацаш хилар вай мехкара Даьхен хӏама лорадераш
«Хьа Турпал» яха Ерригача Россе проект я Махачкале укх деношка йоаржаеш. Тӏема операцена юкъе дакъа лоацаш хинна Бохтаранаькъан Батыр, Чопанаькъан Мухьмад ба цига баха. «Даьхен лорабой» яхача ганзо «Кагирхойи бераши» яхача къаман проектага гӏолла дӏахьош болх ба из. «Сердалога» из хоам кхаьчар ганза регионерча филиалера.
«Къонача тӏехьен Даьхенцара безам, лерхӏам чӏоагӏбара тӏехьа боаржабеш болх бар из. Тӏема моттигашка дакъа лоацаш хинна 100 совгӏа ветеран вар цига гулвенна. Россе мехкашка йоаржае езача Денала урокий сценареш оттаеш къахьегаргда цар. Диъ дийнахьа хургйолча семинаре Даьхенцарча гӏулакхах, къонача тӏехьен нийса кхетам баларах, турпала гӏулакхех, иштта кхыдарех долча оагӏонашца болх дӏахьош, программа вӏашагӏйоллаш хургба уж», - дийцар тха газетага.
Семинара керттера декхар ший Даьхе лораярца, цун гӏулакха ураоттарца дувзаденна да. Тӏема аренашкара цӏабаьхкача ветераний тахан дукха да къонача тӏехьенга дувца. Къонабарий хьехамчаш, хьалхалаттараш болаш, къахьега дезаш ба уж.
