Гӏалгӏайче хьалхара тӏаэцаргья 3D-ӏадсаькх кхоссарах йола Россе чемпионат
Гӏалгӏайче тӏаэцаргья 3D-ӏадсаькх кхоссара Россе чемпионат, цо гулбергба 350 совгӏа чӏоагӏагӏа бола мехка массайолча моттигашкара спортсменаш. Из йоккха яхь дӏахьоргья республикан ӏалама хозача шин моттиге. Керттера яхьаш дӏахьоргья «Мужече» оалача спортивно-туристически центре, хӏаьта тӏеххьара яхьаш хургья Жӏайрахьа кхале - къаьнарча, сийдолча гӏалай комплекса Аьга-Кхала нийсса кӏалха.
«Сога хаьттача цу тайпара яхьаш дӏаяхьар - из вай республикан таронаш хилар тӏаэцар да. Вай я эшаш йола моттиг, ӏалама таронаш, керттердар - спортсменаш, хьаьший, кхетаче вӏашагӏъеллараш лакхача боарам тӏа тӏаэца кийча хилар. Тӏехьарча шерашка, Гӏалгӏайченах йоккхий яхьаш дӏаяхьара йола моттиг хилар. Цу тайпара кхетаченаш дӏахьош хиларо спорт дегӏайоалаю, цо таро лу эзараш болча наха вай республика, культура, ӏадаташ дикагӏа довза.
Геттара белгалдоалаш да, чемпионата финал Гӏалгӏайчен лоамашка дӏахьош хилар, цӏихезача республикан исторически гӏалай юрташта юххе. Со тешаш ва, яхьий доакъашхоша шоашца дукха дика хӏама хьоргда вай республиках лаьца», - аьлар ший телеграм-оагӏон тӏа Гӏалгӏайчен кулгалхочо Келаматанаькъан Махьмуд-Ӏаьлас.
Цо баркал аьлар федеральни Минспорта, Россе ӏаддалхой Федерацена, яхь вӏашагӏъелларашта, кхычарна.
