Гӏалгӏайчен вахархочунна наркотикаш лелаярах кхел йир
Гӏалгӏайче кхел йир Шолжа кхале вахача, дукха наркотикаш лелаеш волча сага. Из зулам (3 д. 30 ст., 5 д. 228.1 ст. РФ УК) леладаьд интернете гӏолла, тоабаца цхьана а волаш. Гӏулакх тохкаш ба Россе ФСБ республикански урхаллен болхлой.
«Судо белгалдир, бехкевеш вола саг, 2024 шера лайчилла бетта, Интернете гӏолла зуламхой тоабах дӏакхийтта хилар. Уж бар Россе доазон тӏа наркотикаш йоаржаеш бола нах. Цу тоабо тӏадиллача декхарах, из вахар Гӏаьбартой-Балкхарой республике, сагаца бувзам а боацаш, къайлагӏа 143 грамм наркотикаш хьаийцар цо белгалъяьча моттигера. Уж цо хьаера Гӏалгӏайче, ше вахача моттиге, хьалха ше леладаьча таразаца эза, кӏезиг-кӏезига дӏа-юха йийкъа, кийчйир. Цхьа дакъа наркотикаш цо дӏалочкъадир ше вахача коа, юхейисараш мичахьа къайлагӏа дӏайоахкаргьяр, яхаш, уйла еш, цо шийца лелайора. Хьалхара дакъа, цо дӏалочкъадир энергетик чухиннача аьшкан банкилга чу, цул тӏехьагӏа из Шолжа-Шахьаре Пхьиленаькъан С.Х. цӏерагӏча урамах ягӏача гаьна кӏалха дӏаеллар. Цу дийнахьа, шоллагӏча моттиге, Пхьиленаькъан, Чкалова урамаш вӏашагӏкхетача наркотикаш дӏайохкаш воаллаш, из хьалаьцар бокъонаш лораераша», - аьлар «Сердало» газетага Гӏалгӏайчен прокуратуре.
Судо цхьа барт бир паччахьалкхен бехк беш волчун хьакъехьа, цу тайпара цун 8 шу набахта валла ха техар. Цул совгӏа, судо лаьрхӏар цун доалахьара рузкъа хьадаккха. ӏаьдала болча пайданна хьаяьккхар мобильни телефон, электрически тараз, уж хӏамаш цо лелайора, ше зулам деча хана.
