ӏаьдалгара хьадоагӏача ахчанца тийшаболх кхостабаьр суде кхаьчав
Пособешца боккха тийшаболх кхостабаь мехкара 43 шу даьнна вахархо суда духьалъоттаргва. Наьсарерча СКР тохкама оагӏон викалаша боккха болх дӏабихьар, из гӏулакх тохкаш.
«Тохкамхоша белгалдечох, 2023-ча шера цу сага ший цӏен-наьнацара къаьста волаш, бер дарах нанна ӏаьдалгара хьадоагӏаш дола ахча лочкъаде дагахьа, цун цӏерах Россе Вахара ганзе бух боаца хӏамаш оттадеш дехар чуденнад. Наьсарера ийца цӏа тоаде из ахча эшаш санна, оттадаьд цо, бакъда цӏа ийца хиннадац. Боккха тийшаболх кхостабаь 700 эзар сом ахча хьаийцад цо ӏаьдалгара, хӏаьта из шийна ма тов дехкад», - «Сердалога» из хоам бера мехкарча тохкама Комитетера.
Из тийшаболх гучабоаккхаш, къахьийгача ӏаьдала болхлоша цун доалахьарча хӏама «соцадаьд», бокъо йоацаш цо хьаийца ахча меттаоттадара тӏехьа. Карарча хана суде тохкаш латт из гӏулакх. Наьсарерча прокуратуро чуденнача гӏулакхага гӏолла дӏаболабаьбар тохкама болх.
