Гӏалгӏайчен, Ростовски областа дешархоша телетӏий дӏадихьар
Наьсарен №19 йолча юкъерча дешара ишколе дагӏача бераша дакъа лаьцар Ростовски областа Неклиновски кхален «НОК» яхача Покровска юкъерча ишколаца культуран-дешара телетӏий дӏахьош. Гаьнарча ишколацара онлайн кхетаче дӏахьош хилар хетадаь дар, халкъа цхьоагӏон Шу хилара, из Ди кастта дездергдолаш хилара.
Цига берашта яйзар Россе шин мехка мах бола исторе, этнографе тӏехьале. Бераша из бувзам дӏахьош гойтар шоаш кийчъяь программа, цар йийшар байташ, иштта кхоллама докладаш. Ростовски областерча бераша шоай нийсархошта гойтар ший къаьстта белгало йола культура, Дона тӏарча гӏазкхий вахара истори.
Шоай аргӏагӏа Наьсарен дешархоша дийцар дукхача бӏаьшерашка денз хьадоагӏача гӏалгӏай къаман вахарах, къаьстта терко тӏаяхийтар Даькъастен къаман эхь-эздела, къаьнарча культуран сийленгашта. Цига белггала езаелар къаман тӏабувхабу гӏирс бовзийташ хинна оагӏув. Цар къоастадир из барзкъа мичахьа, маца дувхадеш хиннад. «Сердало» газета интервью луш, из кхетаче вӏашагӏъеллараша аьлар, телетӏий дӏадахьаро дешара моттигашта юкъера бувзам чӏоагӏбу, кхувш боагӏарашта дикагӏа довзийт гонахьардар, массайолча оагӏорахьара Россе культуран мах бола тӏехьале гойт царна.
Цу кхетачен чаккхе еш, дешархоша, хьехархоша белгалдир; цу тайпара бувзам лелабара дӏахо а дешара боламаш дӏакхахьа деза, аьнна.
