Гӏалгӏайчен вахархо гучаваьлар, кредиташца кетарло лелаярах
Гӏалгӏай мехка 37 шу даьнна Шолжера вахархо гучаваьлар, цо кредитаца доккха зулам дарах. Цунна духьала уголовни гӏулакх хьадийллар Шолжа кхален СКР болхлоша. Из бехке ву РФ УК 3 д. 159.1 статьях.
«Тохкама болх лелабераша яхачох, 2024 шера оагӏой бетта, цо шийна пайда бара, шийна йовзаш йолча кхалсага мобильни телефона тӏагӏолла, кредит эцара дукха каьхаташ дӏадехаш цахилар чу а лоацаш, кредит луча моттиге дехар дӏадахьийтад. Цул совгӏа, харцхьа хоам а баьб из яха моттиг, цун хьатӏабоагӏа пайда дӏаязбеш. Уж хӏиллане каьхаташ ларде а лоацаш, цунна 3,8 млн сом ахча хьатӏаденад», - аьлар «Сердало» газетага Гӏалгӏайчен тохкама комитете.
Цу тайпара цо банка ахчанца дикка зе дир. Хӏанз из гӏулакх тохкаш да. Цар керттера декхар да - из зулам дара сурт вӏашагӏдоллар, тешалаш гулдар, цу сага кхы дӏахо фу леладаьд хар.
