Наьха машин йигарах, бехк бергба Пхьилекъонгий-Юртарча сагá
Пхьилекъонгий-Юртара 28 шу даьнна вахархо, бехктокхаме озаргва наьха машин йигарах. Шийна хахка аьнна наьха машин йигай цо, Iаьдала болхлоша белгалдечох.
«Укх бетта 8-ча дийнахьа Дошлакъий-Юртарча Заьзганаькъан цIерах йолча тика наIар тIа «Тойота «Камри 2.2 GL» машин Iоттаяьй вахархочо. Тика чу дукха га лаьрхIа воацандаь; машин, дIа ца йоаеш, йитай цо. Бакъда, корта бохабеча маларах волаш, юхе гIолла дIаводаш хиннача 28 шу даьннача мехкахочо японски машин дог Iаббалца хахка лаьрхIад, из бахьан долаш ше бехктокхаме озаргволгах вIалла уйла ца еш. Ший «Тойота» йоацилга бIаргагушше, машина дас полице болхлошка хоам баьб», - йоах «Сердалога» мехкарча МВД болхлошкара бенача хоамо.
Сиха оарцагIъяьннача полице Пригородни кхалера хьалаьцар машин. Лоаллаш ваьгIача корта бохабеча маларах хинначо ший хьал тахка гIертача полице болхлоша яхар де тиганзар. РФ КоАП 12.26 ст. бехкевеш Iаьдало Iочувигар из. Наьха машин йигарах боаггIача боараме бехк бергба цунна.
