Гӏалгӏайчен бахархой таро хургья, мах боацаш новкъостал деха
22.09.2026 14:40
Гӏалгӏай Республикан бахархошта, мах боацаш бокъонашца дувзаденна новкъостал дар яхача вахара проекта чудоагӏаш, тов бетта 25-ча дийнахьа моттигера сага бокъонех волча викала Цӏечой Ибрахӏима, республикан Адвокатий палата президента Ховтанаькъан Заретас цхьана бахархой тӏаэцаргба, яхаш, дийцар «Сердало» газетага ГӏР УПЧ хоамий-аналитически даькъ тӏа.
Из кхетаче кийчъеш я республикан бахархой бокъонаш лораяра, царна лакха дикал йола юридически новкъостал дара. Нах тӏаэцача дийнахьа бахархой таро хургья бокъонаш лораерашца дагабала, шоай хаттараш дала, бокъонаш лораяра республикан хьалхале лелаеча говзанчий хьехамга ладувгӏа.
Цига тӏавахара, хаттараш къоастадара бахархошка хила деза паспорт, иштта дувца оттадаьча къамаьла йоазон каьхаташ.
