Кхаьч-кхаьчача нувхаш ӏоувттаераш бехктокхаме озаргба Илдарха-Гӏалий тӏа
13.02.2026 10:14
Бокъо йоацача моттигашка совъяьнна хӏамаш ӏоувттаяьча шахьарерча кхаь сагага из хоаттаргда, ӏаьдала бокъонга гӏолла. «Сердалога» из хоам бир шахьара мэре.
Цигарча депутатий Кхела кулгалхочун гӏонча волча Амаканаькъан Хьусена кулгал деш дӏайихьар из аргӏанара кхетаче. Цига дийцар, хӏара дийнахьа рейд дӏаяхьа арабувлача администраце цу оагӏонцарча болхлоша бокъо йоацача моттигашка цхьацца балхаш деча совъяьнна хӏамаш ӏоувттаяьраш гучабаьхалга.
Дӏа-хьа дийца, цига соцам бир кхаьннена а 1000 сом гӏод тоха. Царна юкъерча шин сага шоашка извещени дӏакхаьчачул тӏехьагӏа нувхашта лаьрхӏа контейнераш оттайир, цудухьа уж гӏод ца тохаш бита лаьрхӏар комиссе.
