Шоай цӀен юхе лорашка чакхбала аьттув баьлар Наьсар-Кертерча бахархой
Наьсар-Кертерча Берий театра доазон тӀа, шоай дегӀа хьал довза безам бараш тӀаийбеш, бӀарчча дийнахьа Наьсарерча ЦРБ лораш хилар. Лорашка чакхбала, царца къамаьл де аьттув бар наьха. Из хоам «Сердалога» бир унахцӀенон болхлоша.
Ший цӀенна гаьнавала ца везаш, цӀий диста, шекар, холестерин малагӀча боарам тӀа латт ха, ЭКГ яккха, кизга оттадайта аьттув бар бахархой. «Иштта чакхвоалаш хиларо ханнахьа хьагучадоах дегӀацара дукха лазараш, масала, дега лазараш, сахарни диабет, цӀи йоаца лазараш, иштта кхыдараш. Тахан латтача бокъонга хьежача, 18 шергара 39 шерга кхаччалца вола Россе хӀара вахархо кхаь шера цкъа чакхвала бокъо йолаш ва.
40 шерал тӀехбаьннараш хӀара шера чакхбувла бокъо йолаш ба. ДӀа-юха лелача лорашка гӀолла чакхвала атта да. Оаш шоай ха, низ боабе ца безаш, шо дахача юрта хьайоагӀа из машин. Поликлинике даха дукха ха йоаеш, аргӀа хьакхачарга хьежаш дагӀа дезац, лораш шо долчча хьабоагӀа. Цул совгӀа, массехк оагӀув чулоацаш чакхвала йиш я цига, хьалххе дӀаязвала а везац, уж хьакхаьчача дӀатӀаваха мара. ДегӀа хьал дика доацарашта, паргӀата ха йоацарашта чӀоагӀа аьттув болаш да из хӀама», - белгалдир унахцӀенон министерстве.
