Кӏада эца гӏийрта Наьсарера яхархо интернетерча зуламхоша ӏехаяьй
Наьсарерча полице болхлой болча енача кхалсага дийцар, интернете гӏолла зуламхоша шийна тийшаболх барах. Кӏадаш дохкаш да тхо, аьнна, цун ахча дихьад цар. 12 эзар сом да царех тийшача мехкахочо дӏатӏатессар, хӏаьта вожаш ахча каракхоаччаше байна дӏабаьннаб.
«Наьсарерча Россе ОМВД тохкама оагӏон болхлоша РФ УК 2-ча даькъа 159 ст. гӏулакх хьадийллад зуламхошта духьала (дикка зе деш тийшаболх бар)», - дийцар «Сердалога» мехкарча МВД.
Ӏаьдала болхлоша массахана санна кхайкарал ду бахархошка тахан а! Боккъал а уйла еш хила оашош деча хӏаман, ма ӏехадайта шоаш зуламхошка, интернете гӏолла базар лелаеча малашб ца ховча нахаца бувзаме ма дувла, царца цхьаккха тайпара базар ма лелае!
Нагахьа тийшаболх хиннабале, ма хулла сихагӏа ӏаьдала болхлой болча гӏо. Зуламхоех шоашта мел ховш дола хӏама дӏаала полицега.
