Гӏалгӏайчен яхархо газах долча декхарах мукъаялийтар прокуратуран лоӏамах
Илдарха-Гӏалан прокуратуро тӏахьожама болх дӏабихьар, моттигерча яхархочо наьха хьашташ кхоачашдеча организацена латкъаш даьча дехарах. Цо дех шийна хьатеха газ йоагаярах дола ахча бокъонах доагӏаш дий хьажар, яхаш, дийцар, «Сердало» газетага Гӏалгӏайчен тӏахьожама боахаме.
Прокурора тӏахьожама болх дӏабихьачул тӏехьагӏа ховш хилар, газа компане дукхача хана денз - 2022 шера наджгоанцхой бетта денз, 2026 шера бекарга беттага кхаччалца газ йоагаярах дола ахча хьатехад цу кхалсага цӏен боарамах доагӏача беса, газ мел йоагаяьй хьагойташ болча гӏирсага ца хьожаш. Уж бокъонах доаца хьалаш юкъедахарах Илдарха-Гӏалан яхархочун газах дола декхар хилар 230 эзар сом совгӏа.
Цу кхалсага га доаккхаш, гучадаьнна кхоачамбоацараш дӏадахара шахьара прокуратуро, газа таронаш лоаттаеча организацен керттерча кулгалхочунна из хьал хьалхадаьккхар. Цу тайпара, тӏахьожама боахама викалаш юкъебаларах, цу кхалсага цӏагӏа латтача счётчика тӏара таьрахьашта нийса мах оттабир, ца доагӏаш хьатеха ахча тӏера дӏадоадир.
