Илдарха-Гӏалий тӏарча дегӏа могашал меттаоттаеча моттиге, ший унахцӏено тоаеш хилар мехкахо
Республикерча унахцӏенон министерствога баркал оалаш, каьхат дахьийтар мехкахочо. Геттара чоалхане лоархӏаш йола операци яьй цунна – голинга тӏехка эндопротезировани. Цо дийцар хьалха санна ког баккха ше ӏомаяларах, Илдарха - дегӏа могашал меттаоттаеча моттигерча тоабан доккха баркал кхайкадеш я из тахан, шийна гӏо дарах».
Каьхат яздаьча кхалсага белгалдечох, цу чу болх беш болча наха унахошта доккха гӏо ду. Цу моттига кулгал деча Гаракхой Беслана Луизайна къаьстта доккха баркал ала ловш яр из: «Ший болх дика бовзаш, массарех дог лазаш йола кулгалхо хиларал совгӏа, ше санна бехктокхаме къахьегаш, шоай декхараш лоархӏаш болча болхлой тоаба я цо вӏашагӏъеллар».
Операци яьчул тӏехьагӏа, доладенна астагӏа лелхар дӏадаьннад цун тахан, хьалха ше хиннача беса борал долаш я из. Цу моттиге ЛФК болхло вола Могушканаькъан Акромат, массажист Кӏуренаькъан Мухьмад, лор - рефлексотерапевт Шаденаькъан Альбина чӏоагӏа дика хьежаб цунга.
«Цу берригача лораша чӏоагӏа къахьийгар со меттайоалаеш, хьалха хиннача тайпара гӏа баккха, йолаяла ӏомаеш. Акромата соца боккха болх дӏабихьаб, из деррига меттаоттаде гӏерташ. Хам баь варгвоацаш чӏоагӏа хьежаб сога уж нах! Царна массанена дег чура доккха баркал кхайкаду аз!»
Илдарха-Гӏалий тӏарча дегӏа могашал меттаоттаеча моттига тоабан балха лакха мах оттабеш я мехкахо, ший хьал Даьла къахетамца аттачахьа даккхарах. Иразе, беркате, аьттув болаш хилда цар вахара денош», - йоах «Сердалога» цу оагӏонцарча министерствера бенача хоамо. Чӏоагӏа лоархӏаме, вӏалла хам баь варгвоацаш да могаш воацача сага боаггӏача боараме терко яр, цун хьал аттачахьа даккха хьажар. Дикача лорага хӏама кхоачаргдац! Шоай болх бехктокхаме дӏахьочарна баркал оалараш дукха хул.
