Гӏалгӏайчен яхархочун пенси ийдара бокъо меттаоттайир
Яндаре яха ӏӏ-ча группан заӏапхо йола кхалсаг Гӏалгӏайчен сага бокъонех волча викалга леткъар; ший пенсена тӏера бокъо йоацаш 4 000 сом ӏодаьккхад, аьнна. Цо иштта белгалдир, ший ханнахьа моттигерча Россе Вахара ганза даькъе, ха яьнна хилар бахьан долаш, страховой пенси эцара каьхаташ ше дӏаденна хилар. Бакъда цунна жоп ца лу дукха ха я, е цун бахьан малагӏа да ховш а дац.
«Цу кхалсага бокъо лораяра, сага бокъонех волча викала СФР хаьттар из дош. Материалашка хьожаш, цу кхалсага ахча хьадоладара гӏулакхага хьожаш, СФР-а къахьегама книжка тӏа болх баь ха харцахьа оттаяь хилар гучадаьлар. Из бахьан долаш ахча нийса хьахьожаде таро хиннаяц. Цул тӏехьагӏа, пенсе гӏулакх законо дӏадехача беса даьккхача, заӏапхо хиларах луш дола пенси (болх беча пенсионера) хьадайтар, из да 17 942 сом.
Хьалха соцадаь хинна ахча деррига а хьаденнад. Цул совгӏа, цунна тӏачӏоагӏдаьд цхьацца аьттонаш - хӏанз цо ийду ӏӏ-ча группа заӏапхо хиларах тарра тӏехьара тӏа 4 397 сом.
