«БАРС» тоабах, контрактах тӏема декхараш кхоачашдарах дийцар Магӏалбика кхален бахархошка
Контрактах тӏема декхараш кхоачашде бахарах дувцаш, кхетаче дӏайихьар тахан Инаркъерча, Дола-Коарча, Соагӏапчарча, Йоккхача Ачалкхерча бахархошца.
«БАРС» яхача тоабанна юкъебахарах, иштта цу гӏулакхаца дувзаденнарех дувцаш хилар гулбеннарашца.
«Кхетаче дакъа лоацаш бар Магӏалбика кхален администрацена хьалха латта Мержой Исраил, Магӏалбикерча тӏема комиссариата болхлой. Ший лоӏаме тӏема декхараш кхоачашде вахача сага ӏаьдалгара хьадоагӏача хӏамах; цун шийна, цӏагӏарча наха луча аьттонех; иштта малагӏа гӏулакхаш да керттердарех дийцар тӏема комиссариатера венача болхлочо.
Къаьстта терко еш дийцар «БАРС» яхача тоабан юкъе хиларах, цу оагӏонца лораде дезача лоархӏамедарех, цхьацца программашта юкъе дакъа лацарах, ӏаьдало царна хьахьожадаьча ахчан боарамах», - хоам бу «Сердалога» Магӏалбика кхален администраце.
Мержой Исраила белгалдечох, иштта йола кхетаченаш дӏакхахьар таханарча дийнахьа лоархӏаме да. Моллагӏа шоашта къувлаш хинна хӏама тахка, дашха аьттув ба бахархой ишттача наькъаца. Магӏалбика кхален хьакимаша йоккха терко еш дӏахьош болх ба из тахан.
