КИФа балхах дувцаргда журналисташа, блогераша
Кавказа инвестиционни кхетаченах болх дӏабахьа йиш йолаш ба СМИ доакъашхой, блогераш. Из хоам «Сердалога» бир мехкарча Паччахьалкхен викалаша.
«Дехар чудала йиш я укх бетта 23-ча денгара бекарга бетта 17-гӏа денга кхаччалца. Минводерча «МинводыЭкспо» яхача МВЦ бекарга бетта 28-ча денгара 30-ча денга кхаччалца хургья форум», - йоах тхога бенача хоамо. Цу йоккхача экономически моттига балхах дувцаргда журналисташа, блогераша. Укх шерара керттера тема «Аьттон доазув шердеш» хургья.
Дакъа лоацаш хургбараш ба хьакимаш, бизнесменаш, аналитикаш, СМИ болхлой. Инвестиционни проектех, моттигий хьал тоадарах дувцаргда кхетаче. КИФе дакъа лоацаш хургба российски, иштта доазол арахьарча моттигий СМИ болхлой, блогераш. forumkavkaz.org. адресах довза йиш я цу балхаца дувзаденнараш.
