«Керттерча декхарашта юкъе хургда Паччахьалкхен Кремлёвски ЦIагIа, РФ Паччахьалкхен Думе, Федераце Совете, Минск, Самара яхача шахьарашка ГIалгIай Республикан Ди дIадахьарга кийчо яр. ГIалгIайчен культуран болхлой тоабаш, мехка тайп-тайпарча моттигашка концерташ ийца гIоргья. Иштта дIа-юха кхухьаш бола республикан музея гойтам а хургба, хIаьта Третьяковски галерее, Эрмитаже ГIалгIайчен экспозицеш хьаелларгья. «ГIалгIайче» яха паччахьалкхен халхара ансамбль, иштта «Магас» халхарий, иллей ансамбль кийчлуш я, белггалара чулоацам бола хореографе концерташ вIашагIдохкаш. Цул совгIа, 100 истинг, «ГIалгIайчен истинга дIаяха ханаш» яха балхаш а да, хьадеш латташ. Арахецаргда мохк тIабола, исторе, этнографе книжкаш, оазархой байташ, кхоллама балхаш тIадола книжкаш: «Берашта лаьрхIа ховли-довзалеш», («Загадки для детей»), «ГIалгIай ловзараш», «ДикагIа дола гIалгIай бIаь илли», «Сакъердаме дувцараш», ГIалгIайчен театра искусство ювцаш дола книжка, иштта кхы дуккхадараш а«, — аьлар «Сердало» газетага ГIалгIайчен культуран министерстве.