Татрий мехка туризмаца дувзаденнараш дайзар вай мехкахошта
Татрий туризмах йолча Паччахьалкхен комитето цу оагӏонца дувзаденнараш довзийтар вай мехкара цига бахача наха. Из хоам «Сердалога» бир цу моттигера. «Пресс-наькъа доакъашхой кхетаче дакъа лоацаш хилар комитета кулгал деш йола Балахонцева Айгуль, РТ Паччахьалкхен комитета туризм йоаржаярах болча оагӏон хьалхалатташ йола Рашидова Альмира, Татрий мехкара вай республикан массазара викал Хьашанаькъан Амир.
Укх тӏехьарча шерашка Татрий мехка кхоачашдаьча лоархӏамедарех дийцар цига. Тахан цига 150 совгӏа отель я, 50 - глэмпингаш. Хӏара шера дӏакхухь Татрий мехка Халкъашта юкъера этнически фестиваль, «Мерза Казань» яха йоккха фестиваль, Къамашта юкъера «Рахлински ханаш» яха фестиваль, «Семык» яха марийски культурах дола цӏай, иштта «Уяв» яха чувашски культурацара республикански цӏай.
Гӏалгӏай мехкара кхаьчача хьаьшашта дийцар 2000-ча шерашка туризмах йолча комитетага гӏолла вӏашагӏабеллача цӏихезача Волжски наькъах.
«Массайолча моттигашка лелаш, хӏама довзаш дола гӏулакх дукха дезаш да тхо дерригаш. Тайп-тайпарча шахьарашка ухаш дукха тамашийна, хоза кхелла моттигаш йовз. Мехкашта юкъе бувзам хилча, керда нах, культура, цар истори довза аьттув хул», - дийцар Балахонцева Айгула.
