Гӏалгӏай жрналистий, блогерий Казанера пресс-никъ чакхбаьлар
Татрий мехко, Гӏалгӏай республико вӏашагӏбелла журналистий, блогерий Казанера пресс-никъ чакхбаьлар. Из хоам «Сердалога» бир цу моттигера. Гӏалгӏай мехкара цига бахарашта дукха хӏама дайра цига. Тӏеххьара сайре Татрий мехкара Гӏалгӏайчен массазара викал Хьаьшанаькъан Амир, «Казанера гӏалгӏай къаман культуран автономе» оагӏон кулгалхо Баьтаранаькъан Ахьмад волаш, кхетаче дӏайихьар цар.
Иштта цига гулбеннабар Казане бахаш бола вай къаман нах, дегӏа могашал эшаеннача берашта хьехача Центре дешаш хинна Галай Омар, вокалист Тутайнаькъан Адам. «Къахетама талгӏе» яхача ерригача Россе фестивале дакъа лоацаш бар уж, укх бетта 1-ча денгара 3-ча денга кхаччалца.
Гулбеннараша дийцар вай мехкарча дешара, спорта, ӏилман оагӏонашца дувзаденнача лоархӏамечарех. Хьаьшанаькъан Амира белгалдир, мехкарча тайп-тайпарча миӏингашка бахаш болча вай къаман нахаца бувзам лоаттабарах, вӏаший оагӏув хьаллоацаш хиларах.
