Диабета духьала къовсам лоаттабе эшаш бола керда гӏирс кхоачаргба вай мехка
Эндокринологически лоархӏаш долча лазарашта духьала болх лелабу мехка. «Дӏаьха, кадай вахар» яхача къаман проекта «Шекара диабета духьалара къовсам» яхача федеральни программага гӏолла, дӏахьош болх ба из. Ер шу йистедалале цу лазара духьала эшаш йола 143 хӏама кхоачаргья мехка.
Мехкадаь зарбан болх лелабераша белгалдечох, царех 104 ӏоахашканаькъан А. цӏерах йолча клинически дарбанче дӏахьожаергья. Шахьарерча поликлиника, Магӏалбикерча, Шолжа-Шахьарерча дарбанчешка дӏайохьийтаргья дегӏацара шекар дусташ бола, лазар гучадоаккхаш, бӏаргашка хьожаш эшаш бола 13 гӏирс.
Республикерча клинически дарбанче йолча эндокринологически моттиге офтальмолога кабинет хьайийллай. Диабето бӏаргашта деш дола зе юххьанца гучадаккха аьттув хургба цига. Иштта цига хьайийллай диабетически кӏоажув яха кабинет. Кога хулаш дола лазар, инфекци гаьна ца ялийта йиш хургья унахой. Республике болх беш я «Шекара диабета ишкол». Унахой, цар гаргарча наьха шекар диста, лазар кӏоарглургдоацаш фу де деза ӏомабу цига.
«Диабет тахан геттара чӏоагӏа даьржача лазарех лоархӏаш да. Чӏоагӏа лоархӏаме да хьакхийттача хана цун нийсса дарба дар, кӏоаргцадалийтар. Цудухьа цу лазара духьала эшаш йола хӏамаш керда хьаяьннарашца хувцаш, хӏетта хьакхийттача хана из лазар гучадоаккхаргдолаш, болх лоаттабу оаха мехка», - аьлар вай Мехкадас. 2026-гӏа шу отталца хургья проект болх дӏахьош. Дӏахо де лерхӏараш дукха да, керда хувцамаш деш.
