ГӀалгӀай Республикан суда 100 шу, Лакхехьарча суда 30 шу дизар дездир
ГӀалгӀайче дездир лоархӀаме ши цӀай: Российски Импере суда балха 100 шу дизар, республикан Лакхехьарча суда 30 шу дизар. Из кхетаче дӀайихьар Магасерча салоӀама, ИнгГУ кхоллама Центре. Цох дийцар «Сердало» газетага ГӀалгӀай Республикан Кулгалхочун, Паччахьалкхен зарбан болх лелабераша.
Цига дакъа лоацаш хилар беза хьаьший: мехка Кулгалхо Кела матанаькъан Махьмуд-Ӏаьла, ГӀалгӀай Республикан Лакхерча суда кулгалхо Фаьрганаькъан ИбрахӀим, Россе Президента СКФО гӀолла вола викал Валиев Айдамир.
Моаршал хоатташ дешаш аьлар РФ Лакхехьарча суда кулгалхочо Подносова Иринас, РФ Президента викала Чайка Юре.
Гулбеннарашта хьалхашка къамаьл деш, Келаматанаькъан Махьмуд-Ӏаьлас белгалдир суда болх лоархӀаме хилар:
«Вай судхоша эггара халагӀча хьалашка болх баьб; вахара-экономически халонаш, политически чоалхане хьал, кхыйола вахара атта йоаца оагӀонаш а йолаш. Тахан ГӀалгӀайче чӀоагӀа вӀашагӀбеллаб судий болх».
ГӀазданаькъан Ӏийсас тӀатехар, республикан судебни болх дукхача хувцамех чакхбаьннаб:
«Республикан судаш тайп-тайпарча исторически наькъ тӀа, Россе ерригача судий лоаттам санна дукха халонаш хьалхашка нийслуш, вай паччахьалкхе дегӀаяра юкъарлонца, политикаца дувзаденна хувцамаш хулаш хьайоагӀа».
Хьаьшашта лаьрхӀа концерт делар Хамхой А. цӀерагӀча Паччахьалкхен филармонена чуйоагӀача халкъа халхара ансамбло, цо гойтар «ГӀалгӀай цхьана деш дола халхар», кхыдараш.
Иштта ашараш лекхар, республикан филармоне халкъа артисташ бар цига шоай программашца баьхка. Культуран программанна чубоагӀаш хилар «Мехка кхел» яха лоаца фильм, иштта «ГӀалгӀай Республикан 1924-2024 суда Ӏаьдал» яха гойтам.
Из кхетаче дӀахьош, цӀихезача суда болхлошта совгӀаташ делар, кхаь судхочоа «ГӀалгӀай Республикан цӀихеза юрист» яха цӀераш елар.
