ГӀалгӀайче 17 ишкол, берий бешамаш тоаергья кхаь шера
883 млн совгӀа ахча дӀадохийтаргда федеральни бюджетера 17 ишкола, берий бешамаш геттара тоаяра, из чудоагӀаш да «Дешар дегӀадоаладар» яхача РФ паччахьалкхен программанна.
ХьатӀадоагӀача шера Наьсарен-Шахьаре, Илдарха-ГӀалий тӀа, Яндаре, Арште, Долакха-Юрта, Эбарга-Юрта дешара моттигаш тоае лерхӀ. 2026-шера уж хувцамаш дӀахьоргда МагӀалбик, Магас оалача шахьарашка, иштта ГӀажарий-Юрта, ЖӀайрахьа. Юххера а, геттара тоаяь йоахаргья МагӀалбике, Наьсаре, Экажкъонгий-Юрта.
«Из программа кхоачашъеш хиларо таро хулийтаргья дешара хьалаш тоаде, берашта луш бола кхетам дикагӀа бала. Дешара моттигаш тахан латтача замах хила езача беса ца хилча, хьалхашка оттадаь декхараш лерттӀа кхоачашде таро хургьяц.
Вай паччахьалкхено 2021 шера шийна хьалхашка оттадаьча декхарах, вай республикера 31 ишкол тоаяьй», - аьлар ГӀалгӀайчен кулгалхочо Келаматанаькъан Махьмуд-Ӏаьлас.
