Республикерча 252 дешархочо дошо майдилгаш яьхар
Вай мехкарча 252 дешархочо ишкол чакхъяьккхар укх шера, дошо майдилгаш йоахаш, 133 сага дото майдилгаш елар. Кердача вахара наькъ тӀа гӀа боаккхаш бола кагирхой даькъалабувцаш, мехкадас Келаматанаькъан Махьмуд-Ӏаьлас теркалдир, майдилгаша цар дешарцара безам, къахьега ловш хилар белгалделга.
«БоаггӀача боараме шоаш дӀахьокхаш, чакхдаьккхар цар дешар. Дог тийша ва со, иштта къахьега ловчарга хьежаш кхы а дукха толамаш да, хӀаьта из хӀара моттиг вай республика дӀахьокхаш хургья», - аьлар Мехкадас.
Доккха баркал кхайкадир мехка кулгалхочо берий даьшта, ноаношта цар оагӀув хьаллоацаш, дешарцара безам цар дегашка чӀоагӀбеш лаьттача, иштта къахьегаш хиннача хьехархошта. Мехкадас белгалдир, лакхача толамашка кхачар таханарча дийнахьа федеральни оагӀоно вай мехка лоаттадеча новкъосталга гӀолла долга: хьалъеш латт керда, паргӀата ишколаш; тишъеннараш, боккха болх дӀахьош, тоаеш латт.
«Кхоанарча вахарга майрра хьажа аьттув ба вай тахан, из бахьан долаш. ГӀалгӀай мехкара хӀара бер паргӀата, хоза, боаггӀача боараме деррига тоадаь, Ӏалашдаь латтача ишколе дешаш хургда», - тӀатехар вай Мехкадас.
