МагӀалбика къаьстта а боккха лоархӀам хиннаб, хӀана аьлча из иллай мехкдаьтта доаккхача Шолжа-ГӀалийга, Бакуга бодача новкъа. Немций эскар цу маьхерча оахкала тӀакхача гӀийртад, хӀаьта цунга бода никъ эггара лоацагӀа Ӏалхан-Чурта атагӀа гӀолла бодар хиннаб. МагӀалбиках хьахиннаб Каквказе лаьттача тӀема керттера шод, из хьабастарах тийша яр берригача тӀема дӀахора кхел.

ГӀалгӀай мехка кулгалхочо Келаматанаькъан Махьмуд-Ӏаьлас белгалдаьккхар, котало яккхарах, дуккхача наьха синош Ӏодехкаш, боккха мах бала бийза хилар. Иштта цо хьоахадир, уж нах биц ца беш, дагабоагӀаш хилар лоархӀаме да тӀехьа тӀакхувш йола тӀехье денал долча салтий вахарах масал эцаш кхееча.

«ГӀалгӀай, эрсий, гуржий, нохчий, гӀуозлой, селий, кхыдолча къамех бола бӀухой, оагӀох оагӀув теха, Даьхе лораеш лаьттаб. Барт хиларо гӀо даьд царна Сийлахь-боккхача Даьймехка тӀем тӀа котало яккха, фашизм эшае», - аьннад Келаматанаькъан Махьмуд-Ӏаьлас.

Цо иштта масалаш кхийлар таханарча бӀухой цӀераш йоахаш, лаьрххӀача тӀема операцена юкъе болаш, мохк лорабеш, хьабоагӀа уж.

«Цар а шоай бартаца, цхьоагӀонца эшаергья фашизм», - тӀатехар Мехкадас.