Къамашта юкъера рейсаш хьаелларгья «Магас» аэропорто
Осканаькъан Сулумбика цӀерах йолча «Магас» аэропорте дӀадахьа лерхӀача хувцамех дийцар республике кхаьчача экономикан хьал доаржадарах йолча Министерствон хьалхалаттачун гӀонча волча Назаров Сергейца. Из хоам «Сердалога» бир Мехкадаь зарбан болх лелабераша. «Эггара керттердарех да, Москве дийнахьа кхозза хургйола рейс хьаеллар, иштта кхыйола шахьараш юкъелацар. Карарча хана, дикка тоадаь латт оагӀонаш: Самара, Санкт-Петербург, Сочи, Тюмень, Петрозаводск», - йоах хоамо.
ЛоархӀаме гӀа боаккхаш хургда аэропорта хьал тоадара тӀехьа Россе паччахьалкхен доазон чакхйоалаш йола фецара моттиг хьаеллар. Цу гӀулакха эшаш бола проектий кхоачам кийчбаьб, цу моттиге паччахьалкхен экспертиза дӀайихьай.
2025-ча шера, беррига болх йистебаьккха, хьаелла лерхӀ из моттиг. Аэропорта хьал тоадара тӀехьа кхычахьара болхлой юкъелаца лерхӀ, карарча хана Росавиацеца, концессионерашца из гӀулакх дувцаш болх дӀаболабаьб, иштта Къамашта юкъера рейсаш хьаеллара тӀехьа къахьегаш ба.
Царна юкъе Казахстан, Туркий мохк, Гуржий мохк, Саудовски Арави, Цхьанкхийтта Ӏарбий Эмираташ, Мисаре, Китай. 2030-гӀа шу кхачалехь, боккха болх дӀахьош тоае лерхӀ «Магас» яха аэродром, фецара кема айлуш бола никъ, иштта хьабелла лерхӀ цхьаькха никъ, кхы а диъ кема Ӏоха моттигаш хургйолаш шердергда доазув, къамашта юкъера керда терминал хьалъергья, цул совгӀа, кхы а дукха балхаш да кхоачашде лерхӀараш.
Из деррига кхоачашдаро таханарча хано дӀадеххача тайпара, дӀа-юха ухача наха йоккха атто луш хулийтаргья «Магас» аэропорт, мехкарча туризма, бизнеса хьал дикка тоадергда.
