Велосипедашца лелача къонабарий кхерамзлен хьал лорадеш ба автоинспектораш
Наькъашкара берий кхерамзле лораеш хилар эггара лоархӀамегӀа долча декхарех да тахан. Цу оагӀонцара болх дикка къахьегаш дӀахьош ба РФ МВД Госавтоинспекце оагӀон болхлой. Берашца кхетаченаш дӀакхухьаш, наькъашка лораде дезараш царна хьалхадоахаш ба ГИБДД къахьегамхой.
«Велосипедаца арадаьлча лораде дезараш малагӀаш да довзийт берашта. Къаьстта йоккха терко еш белгалду, 14 шерга кхачанза долча берий велосипедашца машинаш лелача новкъа арадовла бокъо йоацилга. Иштта берашка дийцар, машинаца воагӀачо зувргдолаш, велосипедах, тӀадувхача барзкъех къегаш, сердал луш хӀама йоаллае езилга. Мичахьа саца веза, дехьавоалача хана эггара хьалхагӀа зе дезараш малагӀаш да, хьалхадаьккхар къонача тӀехьенна», - дийцар «Сердалога» ГИБДД болхлоша.
Велосипедаца арадаьннача хӀара бера йовза еза наькъашкара бокъонаш. Боккхийбараша массахана хьалхадаха дезаш хӀама да из. Из деррига довзийташ дола каьхаташ дӀадийкъар берашта.
