ГӏалгӀайчен 40 совгӀа болча ишкол яьккхарех, тӀема дешара курсанташ хилар
Карарча шера 40 совгӀа ишкол яьккхараш ГӏалгӀайчен Герзашцарча низашка шоай дешар дӀахо дӀахьош ба, тӀема дешара мугӀарашка этта. Цох дийцар ГӏалгӀай Республикан Кулгалхочун, Паччахьалкхен зарбан болх лелабераша.
ХьатӀадоагӀача шера, республикан выпускникашта 47 тӀема дешара моттиг кийча я шоай наӀараш хьаелла, царна юкъе 42 Россе Герзашцарча низий Министерствон, йиъ федеральни Ӏаьдала органий урхалений, цаӀ - Россе МЧС доалахьа я. Деша отта ловраш харжар дӀадоладелар тов бетта 1-ча дийнахьа.
Карарча шерга диллача, вузий спискаш тӀа кха а йиъ моттиг тӏакхийтар: Нижегородски, Саратовски лакхера тӀема-инженерни училищеш, Новочеркасски бувзама училище, иштта Воронежа радиоэлектроника училище. ТӀема комиссариаташ каьхаташ хьаийдеш я.
ГӏалгӀайчен кулгалхочо Келаматанаькъан Махьмуд-Ӏаьлас белгалдир, тӀема вузе оттар - из дика дешар дийша хилара бола аьттув ба, иштта Даьхе лораяра дакъа юкъедар а да.
«Тӏема кийчо - из боккъонцахьа йола ишкол я, Даьхенцара безам совбоаккхаш, бехктокхаме хургволча сага оамал чӀоагӀъеш йола. Белгалду, дешархой бӀарчча паччахьалкхен Ӏалашо йолаш хилар, цу юкъедоагӀа цига Ӏеш хилар, даар, лорий терко лоаттаяр, цул тӀехьагӀа балха оттавар», - аьлар республикан Кулгалхочо.
